Xaflad qalinjebin ah oo ka dhacday Machadka SIMAD ee Muqdisho

Muqdisho – February 24, 2007

Xaflad si heer sare ah loo soo agaasimay oo lagu xusayay qalinjebinta 53 ardey oo dhameystay waxbarashada Bachelor of Information Technology ayaa 23kii February ka dhacday hoolka shirarka ee isla machadkaasi.

Ardeyda xafladda soo qabanqaabisay oo ah fasalka BIT-03, oo iyagu machadka billaabay sanadkii 2003 ayaa iyagu iskood u go’nsaday inay gabagabada waxbarashadooda ka dhigaan mid xusuus badan, iyagoo dadkii xafladda ka soo qeyb galay u soo bandhigay barnaamij isku dheellitiran. 

Waxaa ugu horreyn xafladda lagu furay barnaamij ka hadlaya mashruucyada qalinjebinta ee ay ardeydu diyaariyeen kuwaasoo barnaamijyo dhanka computerka ah oo intodoa badan waxtaraya waxbarashada iyo ganasciga Soomaalida. Waxaa barnaamijyadaasi ka mid ah barnaamij loogu talogalay shirkadaha diyaaradaha, mid imtixaannada lagu qaado, mid maktabadaha looga dhigayo online, barnaamij ay shirkaduhu ku qoran karaan shaqaale cusub.

 Waxaa kaloo halkaasi ka hadlay Mudane Xasan Badawi oo ku hadlayay magaca waalidiinta ardeyda qalinjebineysa, iyadoo Mudane Badawi uu aad ugu dheeraaday masuuliyadda saran ardeyda qalinjebineyso iyo sida loogaga baahan yahay inay wax u qabtaan dalkooda ka burburay dhanka bulshada, dhaqaalaha, siyaasadda, iwm.

 Waxaa ereyo soo-dhoweyn iyo faahfaahin kulliyadda IT ku saabsan halkaasi ka soo jeediyay madaxa Kulliyaddaasi Md. C/salaam Yusuf oo ku dheeraaday kulliyadda iyo waxqabadkeeda, isagoo xusay in waxqabadka ugu muhiimsan kulliyadda ay ka mid yihiin inay sameysay barnaamijyo ay isticmaasho Hay’adda Muslimiinta Afrika. Wuxuu sidoo kale xusay inay qabyo-tireen website loogu talo-galay ardeyda ka qalinjebisay SIMAD, si ay iskula socdaan oo ay isku dhaafsadaan aragtidooda.

 Md. Xasan Sheekh oo ah Hormuudka Machadka Simad oo isna halkaasi khudbad ka jeediyay ayaa ku dheeraday halgankii uu soo galay Machadka SIMAD, isagoo xusay inay soo martay semester la waayay ardey isku diiwaan gelisay kulliyadda IT-da, halka manta ardeyda wax ka barata kulliyadda IT ay gaarayaan 500 ardey oo ah 50% ardeyda Machadka.

Waxaa sidoo kale halkaasi ka hadlay Mr. Junaid Axmed oo ka mid macallimiinta u dhashay dalka Pakistan ee wax ka dhiga Machadka Simad, wuxuuna Md. Junaid sheegay in macallinku doonayo inuu abaalmarin ka helo ardeygiisa, “abaalmarintaasina waa in macallinku arko ardeygiisa oo noqday madaxweyne, raysal-wasaare, wasiir ama qof kaloo magac leh oo mustaqbalka ku faani karo inuu wax soo baray.

Waxaa aad loola dhacay hadal uu jeediyay Macallin Allah Bakhshi oo isna ka mid ah macallimiinta wax ka dhiga Machadka Simad, wuxuuna Md. Bakhshi sheegay in ardeyda looga baahan yahay inay lahaadaan anshax suuban, mar kastana la socdaan sida teknooljiyadu isku bedbedleyso isagoo tusaale u soo qaatay in markuu Pakistan joogay uu mar kastaba baran jiray cilmi uusan aqoon xilliyada uu fasaxa yahay.

Waxaa sidoo kale halkaasi ka hadlay Md. Maxamed Shariif oo Hor-joogihii bahdii soo qaban qaabisay xafladdaasi, isagoo ka-qeybgalayasha uga mahad celiyay waqtigooda qaaliga ah ee ay soo hureen, wuxuuna ka hadlay ardeyda qalinjebineysa dadaalkooda iyo waxqabadkooda. Mudane Shariif wuxuu sheegay in ardeydani ay horay uga qeyb qaateen gurmadkii abaaraha ee 2006, kii fatahaadaha, iyo howlo kale oo ka mid ah horumarka bulshada, wuxuu sidoo kale u mahadnaqay shirkadaha NationLinks iyo Dahabshiil oo iyagu ka qeyb qaatay xafladdaasi.

Ugu dambeyntii waxaa haddiyado la guddoonsiiyay Hormuudka Simad, Kuliyadda IT-da ee SIMAD, macallimiinta kala ah Mr. Junaid Axmed, Allah Bakhshi iyo Ustaad Maxamed Xuseen oo ka mid ah macallimiinta loogu jecel yahay Machadka Simad, 4 ardey oo ka mid ah ardeydii qalinjebineysay oo ku guuleystay imtixaan shaqo-qoris oo ay qaadday shirkadda Telecom Somalia.

Xafladdaasi oo intii ay socotay ay dhex-taal u ahaayeen heeso iyo ruwaayad ay jilaayeen fannaaniin ay ugu muuqdeen Ilka-case, Aw-Kuuku iyo Marshaale ayaa waxay dadku aad ugu ammaaneen sida ay u gudaneysay dhambaalka ah in waalidku qiime weyn siiyo waxbarashada si looga baxo aqoondarrada.

Bahda Somali Education oo ka qeybgalay xafladdaasi waxay xafladdaasi ku tilmaameen inay ahayd mid aad u qiime badan oo ka tarjumeysay ujeedka loo qabtay.

Halkan ka daawo sawirrada xafladda (Guji)

Waxaa diyaariyay:
C/Risaaq Axmed Cabdiraxmaan (TODAY)