Qaar ka mid ah dugsiyada magaalada Muqdisho oo la xiray

Xaaladda ammaan-xumo ee ku soo korotay magaalada Muqdisho waxay sababtay in albaabada loo laabo qaar ka mid dugsiyada waxbarashada ee magaalada. Dugsiyada albaabada loo laabay oo isugu dugsi-Quraan iyo iskullada caadiga ahba ayaa waxaa soo foodsaaray xaalad rajo-xumo ah iyo bara-kac ku yimid ardeydii wax ka baran jiray dugsiyadaas. waxaa dugsiyada albaabada loo laabay ka mid ah dugsiga Indhoolayaasha ee Alnuur.

Qaar ka mid ah ardeyda Soomaaliyeed

Madaaficidii laysku weydaarsaday magaalada Muqdisho habeenimadii Talaadadu soo galeysay waxay laba goor ku dhacday albaabka hore ee dugsiga Imamu-Shaafici oo ku yaalla agagaarka kaasabobolaare, waxaana madaafiicdaasi ay geysteen khasaare dhimasho iyo dhaawacba leh. Hase yeeshee qaar ka mid ah iskuulladaasia ayaa weli furan iyagoo u dhabar-adeygay marxaladda sii xumaaneysa ee Muqdisho.

Ardeyda qaarkood aya walwal weyn ka qaba inay waxbarashada ka kala go'do, gaar ahaan ardeyda mareysa sanadkan ugu dambeeya ee dugsiga sare ama jaamacadda, kuwaasoo bara-kaca magaalada ka socdo uu dhibaatada ugu weyn u geysanayo.

Macallin dugsi ku haya mid ka mid ah xaafadaha magaalada Muqdisho ayaa Somali Education u sheegay inuu dugsigiisa xiray kadib markii 90% ardeydii wax ka baraneysay ay bara-kaceen, isla markaana kuwa haray aysan si joogto ah u imaanin dugsiga.

Bahda waxbarashada magaalada Mqudisho ayaa sheegay inaysan weli soo marin marxalad tan oo kale oo saameyn weyn ku yeelatay waxbarashada magaalada, waxaana jira isku-dayo lagu doonayo in lagu soo hormariyo imtixaankii dugsiyada oo la qaban jiray bisha May si ubadka qosaska qaxaya aysan waxbarashada uga kala go'in.

 Xafiiska Somali Education ee Muqdisho