Muqdisho - May 13, 2007
Howlihii waxbarashada ee magaalada Muqdisho ayaa dib u billowday horraantii bishan May kadib muddo ka badan bil ka badan uu dagaal lagu hoobtay ka soconayay magaalada Muqdisho.

Dagaalka ka dhacay magaalada Muqdisho ayaa saameyn weyn ku yeeshay waxbarashadii magaalada. Waxaa bara-kacay ardeydii iyo bareyaashii. Waxaa dugsiyada iyo jaamacadaha qaarkood lagu garaacay madaafiic waaweyn, iyadoo uu burbur xoog lihina soo gaaray. Jawiga magaaladuna ma ahayn meel wax lagu baran karay. Goobaha waxbarashada qaarkood waxaa dagay ciidamo sida jaamacadda Muqdisho oo ay fariisin ka sameysteen ciidamada Itoobiyaanka ee Muqdisho ka dagallamay.

Waxaa dalka si dhaqso leh uga dhoofay qaar ka mid ah macallimiintii ajnabiga ahaa ee wax ka dhigi jiray jaamacadaha dalka sida kuwii wax ka bari jiray Jaamacadda banaadir iyo Machadka SIMAD.

Xilligan oo ku beegan waqtigii ardeydu u fariisna jireen imtixaankii kama-dambeysta ayaa dugsiyada qaarkood, gaar ahaan kuwa hoos taga dallada FPENS, waxay go'aansadeen in kaliya imtixaanka laga qaado ardeyda u fariisaneysa imtixaannada 9aad iyo 12aad, halka ardeyda fasallada kalena loo qiimeynayo imtixannadii ay galeen bilihii ay dugsiyadu furnaayeen.

Dugsiyada qaarkood sida Axmed Gurey ayaa imtixaanka ka qaaday qaar ka mid ah ardeydii dugsiga sare ka qalinjebineysay, halka ardeyda harsan ee xilligii imtixaanka la galayay ka maqneyd magaalada iyagana laga qaadi doono billowga bisha Juun. Iskuullada kalena waxaa loo ballansan yahay in imtixaannada laga qaado dhammaadka bisha May ama billowga bisha Juun.

Dagaalku wuxuu kaloo saameyn ku yeeshay niyadda ardeyda wax barata. Qaar ardeyda ka mid ah ayay guryahooda uga gubteen buugaagtii iyo dharkii ay wax ku baran jireen. Qaar kale waxaa saameyn ku yeelatay naxdintii ka soo wajahday dagaalka, iyadoo laga yaabo inay dagaalka ku waayeen qof qoyskooda ka tirsan.