Baroordiiq loo sameeyay Marxuum Ustaad Dhoobaale

Muqdisho September 10, 2007

Xaflad baroordiiq ah oo lagu maamuusayay waxqabadkii Allaha u naxariistee ustaad Maxamed Axmed Xuseen (Dhoobaale) ayaa lag qabtay magaalada Muqdisho, iyadoo munaasabaddaasina ay ka soo qeybgaleen maamulka iyo macalimiinta machadka SIMAD, bulshada rayidka iyo ardey badan.

Ustaad Dhoobaale ayay kooxo hubeysan ku dileen magaalada Muqdisho 3dii September ee sanadkan, isagoo markaasi ku sii jeeday gurigiisa goor uu ka soo baxay shaqadiisii.

Ustaad Dhoobaale ayaa ahaa nin lagu yaqaano karti iyo maskax furan, wuxuuna sanadihii ugu dambeeyay gacan weyn ka geystay baahinta waxbarashada. Marxuumku wux ahaa maskaxdii ka dambeysay Machadka caanka ah ee SIMAD. Sidoo kale wuxuu gacan ka geystay aasaasitaanka machadyo kale sida SOHDEC, isagoo sidoo kale machadyo ka furay gobollada Puntland. ustaadku wuxuu sidoo kale la-talin siin jiray bahda waxbarashada iyo ganacsatada Soomaalida.

Allaha u naxariistee Ustaad Dhoobaale wuxuu ahaa qof aan marnaba dalka ka bixin muddadii burburka, isagoo muddadaasna ku howlanaa horumarinta waxbarashada Soomaalida.

Allaha u naxariistee Dhoobaale wuxu noqon doonaa nin ay tabi doonto bulshada Soomaaliyeed.

Bahda Somali Education waxay aad ga naxeen geerida Dhoobaale, waxayna umadda Soomaaliyeed iyo qofkii uu ka tagayba uga tacsiyadeynayaan geeridaas naxdinta leh.

Inaa Lilaahi wa innaa Ileyhi raajicun